KA NU DAWTNAK

Thadih zaangba ngaiin thlakua naka pawi
Ka damnak caah eidin naa hnek
Vawlei ka hmuhhlan ah zingnu sinah thluachuah
na ka hal piak.

Nganfah tuarin nuhrin sen naka peek
rukkhua hliahcang thlentiput in
thlantlangah na dir.
kei nafa ttah aw ka nu nganfah damnak.

Hrulhhralh thisen he kei nafa na ttang nemah
chanh in khuanu vanni bongmar na ka hal piak
dongcat thiam lo ka nu dawtnak.

Ka pa nih sumser darkhuang cumh bang
an cumh lio caanah mitthli he
kei nafa ka nunnak hupphanh na zum
chungkhar ah daih le remnak na hun ser tawn.

Nilin khua el lakah kei nafa puak buin
fale zawnruah ah rianhrang na ttuan
pasal caah zaanghlei cawiin
congttial na zuk.

khualtlung mileng cinglaa ruahchan caah
puitling nusal dirhmun na dir
inn chungkhar ah na mithmai ni nu
bang a tlang peng.

"Nu chim co lo zabui lamtlang a ril' phungbia
na hun ka chim tawn
Khuaza vankil dengin ka nu aw thlam
kei nafa thinlung meibang an lin.

Ka nu na dawtnak kan chamkhawh hlan
zingnu nih nunkhua saunak in pe seh
ttap ti hin hlah law 'hmuh sung ton har"
an ti bang thaizing ah kan i ton lai ....ka Nu.

Salai Peng Za Hnin