I LUNG SAK KO SIH

Hmunkhat ah
Merh zirziarte in nih caan le
Chawnhbiak caan hmanh maw?
Kan ngeih ti lo ee..,
Online chung i ton caan te hi
I lungsak ko u sih Salai!
Kan um nak aa khat fawn lo cuta

Aliamcia caan kan leen tawnnak
Duhbia kan phai tawn nak
Hmunhma hna kha
Tintling cung ka zau zawn lawng ah
Ka zaanmang in kan hmuh tawn ee
I lungsak ko ning zaanmang hi
Ton than can um fom lo cuta


Zeizong vialte nehbuar an kai dih cang
Caantha kawl zongah hmuh ton um ti lo ee
Nang na zaan cu kei ka chun a si cang
Kan hmunhma aa dang cang ee
Zuun ngaihnak thla ka samh ka zuang
Salai nang sinah ka ti zawn ah
I lungsak ko ning vawlei si ka ti than tawn ee

By: Mai Senripar

TUUFA TLAU BANG!

Wine bang ritkhawh simi
Power ngeimi na hoiher,
Mitfang an i ton caan
Kei thinlung Ralpi bang
Aa tu, aa do ai ci …..

Lungdaih hnangam petu
Na mithmai panh, aanthlum
Zungzal thang, hnathlam ah,
Nang kan hmuhton lo ni…
A tlaumi tuufa bang
Lileng in fingkip ka cul…

By: Holy

MANGTHA KAPU

Ngaihchiatnak darking tumthawng
Kan innchungkhar vialte kan tap
Kan tah thawng nih
Khuaza kip cul
Na liam sia herhlah ka pu
Mithli za kan thlak
Kan siang hrimhrim lo
Kan lungthin kekkuai dih tiangin
Nunnak ngei lo mi na pum lawng
Kan tap kan muai ka celh hrim lo
Kapu hi a tuar tuk liam ko seh kan ti
A celh hrim ti lo a batuk cang kan ti
Nate mu
Ataksa a vandai cuahmah ah khan
Vawilei cungphung a si ka ti ko nate
A dihdong nak kong tiang khi
Kan rak ruat kho bak tak lo
Asina in
Na liam tak tak ko
Kan i zum kho bak lo ka pu
Mangtha ko kun law
Kan i siang lo ka ti zong ah
San a tlai ti fom lo cu ta

By; Mai senripar

PA LE NI AH NA LIAM CU

21.6.09 lio can ah khan cun
Kapa zuun kan rak cuai tawn
28.1.98 ni um hlahsehlaw cu
Kapa na bau hnga lo mu kan ti
Natein
Ka rak i hnem ko ka pu aum tiah
Ka pa aiah pa can dawtu ka pu
Phone ka rak chawnh kha
Kan rak in bochan tuk kha mu
21.6.10 hi ni te
Kan nun tuanbia a tliang tu ni
Kan ruahchannak inntung a tluk ni
Aw lawk chong vansang kan au ni
Kan ngaktahnak a faak tuk
Na mui hmuh ti lo ding
Mitthlam lawng ka suai cang ding mi
Na mui a dawhnak kan zoh ni;
21.6.10 ni hi Mivial te kan tap eeeeeeeeeeeeee...




By: Mai Senripar

KA PU ZUUNNGAIH PAR

JUNE 21

Philhum hram seh, kati zawn ah
Kapu na zuun ngaih in
Aho hmanh hmuhlo, tintliang cung ah
Na zuun tlem in ka hram tawn ee...

Na rak intuar nak hma kha
Ho hngalh piak lo in, na rak in ruangmang kha
Na duh mi hmanh kan rak in theihpiak lo
Na fa le nih mu

Kan nungchung philh kho lo in
Kan rak ruah theu tawn ding
Na nundam lio caan kha
Atu ah cun
Na zuun aa zel, kan nunnak ah
Nang lo nun hi tuarhar kan ti

Hlan ban tuk, khuachin tluang in
Ton lai ni thla nitin rel zongah
Rel chan santlai ti lo?
Tuar har khun e nang na liam hnu


June 21; Na um chung hi
Pu zuun cuai in hram rih ko ning
Ka thinlung nih a celh chung
Biangno mithli a um chung cu
Ka pu nang ngaih zuun hi
Puam ri ko si

By; Mai Senripar

KAN HNGAH NI CEU

Ni nih run chuak, fing le tlang in;
A dawh, kan Lairam cu
Zei Ram hmanh nih an iang kho hnga maw?
Mitthlam na cuang, kei thinlung ah;
Philh ni um lo, Zungzal in
Semnak Lairam, kan Ram chuahtak
Alang lo, tlanghra dan
Sui ngun chuahnak, Ram sang ah,
Um ko hmanh ning;
Kan Lairam fing le tlang hna, thlizil hna nih
Mi thinlung ah nan caam khun ko

Zeitik tiang hen, kan um rih lai
Kawl Bawi hna, Ram uk pennak hna nih
Fah khun tuar, chim kho lo
Thinlung chungah;
Dam kho ti lo hma chia bang in,
Chin miphun nih kan tuar ko maw?

Kan tuarnak nih, caan nikhat ah;
A dawh tuanbia, an si te lai..
Kan bawm Cungzing, lai rel hramlaw,
Kan Ram pennak, semnak Lairam;
Kan hngah ni ceu zeitik tiang maw?

By: Cungnawlthawng

NANG CA NA TAA KEI CA KA DAWT

Khua nih hungpau ai cang,
Zun ngeih a zual khun
Fiakfai nih tlang cungin
Khing riangmang in awn than hna
Mei thang hna nih tlangkip an cul,
Van vaa hna nih sang chin zuang hna,
Lengle val rual nih tingtang tum in
Thlavang tang ah zaihla sa than lai,

Zarhte hung chuak,Tiva panh than dih lai,
Zanlei tinpah, Kawp cio in
Khuhlu hrawng than hna lai,
Zarhpi hungchuak an kawp cio he,
Biakrun sang panh than hnalai,
Kei thei hrawn hrilh than hna
An kawp cio he.

Ka dawt nangbel kawp ngei lo len caan sau ai cang,
Zohcim lo naa dawhnak na iang le
Na rei kiang pawng thut cim hlan ah,
Thencaan cu a hung phan,
Zei dang ruang si lo Vai lian hna ruang ah,
Fak khun kan tian,

Kan khua mual le hau hnar ka liam ni cu,
Zingnu ser thil nung hna le thingkung saram phunkip,
Ka mit thlam ah nang mui cuang hna,
Rili ral liam in, Mi tial hna kut tang ah Sal rian tuan hi zei can tiang hen
Kaa nawl rih lai..

Zawl Tling, Ngan Bawm sunghno nupa
Kheng hna hmanhseh; Iang hlei ka dawt
Nang ca na taa, Kei ca ka dawt.
A thiang dawtnak, A fek dawt nak,
A thlum dawtnak, A dawh dawtnak,
A sung dawtnak, Hmunhram ko seh
Nang le kei kar ah; Hi lei dongh tiang,
Khua chin tluangdangin,

Tiam cia kan bia rawk hlah sehlaw,
A nganfah te zong a dam ko hnga

Lai Kam Thang
MALAYSIA

PANGPAR

A rak i-aih tawnmi angki leng a sente
A thawng te innleng i a rak cheuhmi pear
Ca a va piah tawn; aa her i a lang
Tlang linak khabe zumte

Kum tampi a rauh tikah cun
Tampi an rak taang lo
Cutin kum tampi a rauh tikah cun
Tlawmte in lungne a tho ko

Semmawng lio izah bu i tlaihchannak cu
Kum an liam par bang a rak ziam
Caan aa leh sin par tthan ser dingah maw
A rim a rak taan
A ziamh lungriam lo ruangah dah
Atu tiang a hmui;
Pangpar aw...

By; Salai Zing Mang
[2010 June 30]

RAK PHILH HLAH MU

Khuaza van kil, hluan rel Laimi
Semmawng nupa, leeng le vaal ttha
Na chuah semnak, Lairam na nu
Mitthli rual he, nang ngaih zun tuar
Cilio va bang, hram ai nak thawng
A zuang kan cung, ngunnu va ca
Zual thanh zilthli, na theithiam maw
Rak philh hlah mu

Na chuah semnak, na nu Lairam
Nang bau ai cun, a li a leeng
Khuaza a ruat, lung sifak in
Mi kut a zoh, mi van a hai
Run inn dai le, lungrual hauhruang
Saa ral mii ral, ton ai phang in
Merem thiam lo, zanmang tiang in
Rak philh hlah mu.

Zingnu thluachuah, semnak Lairam
Fapa ngeihchun, nang lawng na si
Lungthli kan tum, Mang Bawi sinah
Rak i zuam mu, Sang Chin Lian Ding
Fimnak thiamnak , ngunza rual he
Kan run inn tual, bual kai hlan ah
Rungtu dingah, rak kir tthan bel
Rak philh hlah mu.


By; Plato Van Rung Mang

KAN RAM CHIN RAM

Philh khawh si lo kan ram Chin ram
A ho ram hmanh si lo kan ram Chin ram
Zanmang hmanh ah philh khawh si lo Chin ram
Fa le thluachuah phorh piaktu Chin ram

Laihri tan nak; Miphun dawtu Chin ram
Chinram cu Chin mi nih philhsual hmanhseh
Dawtu Chinram nih a kan philh kho lai lo
Zeihmanh chuak hlah hmanhseh, Kan ram Chinram

Vakvai hna maw Chin miphun ramkip ah
Kan tuan mi rian sal rian sihmanhsehlaw
Cawmtu an vawilei Chin mi ke tangah
An ram an vawlei Chin mi tlawng kho ve

Kan dawt Chinram,Vai lian, Khuai ngal pawl nih
An duh paoh in, In seh hmanhhnasehlaw
Kan biak zingnu nih an zoh sawh lai lo
Zingnu min in ni khatkhat ah cun
Mei in hlio an ton caan um ve te kolai...
Daw Tu Chin Ram...

Lai Kam Thang
Malaysia pudu

A POI LO CHAN UK THANG

Tingtang tum naak, kut neem nih
Zei ruang ah hen, hi siang hnuai
A tleih rih ko, a tu tiang
Ruat thiam ai lo, a poi lo Chan Uk Thang

Nan khua holh le, mi zaw chonh
An ti tawn ttung, phun tungtu
Zei ruang ah hen, Ruaro khiah aw
Hringsor tu nih, a tleih ai
Ruat thiam ai lo, a poi lo Chan Uk Thang

Khua lipi ah, eidin thaw hna
Tam kun ai seh, na tem lo
Tupi chungah, caam ta ko
Ngal rual he maw, naa komh rih
Mautuai ruatuai, cuh cung in,
A poi lo Chan Uk Thang

Fingrei a cat cang lai hih
Hngaak rih ko kun, I hne ko
Napa phuntung , naa chawr te lai, mipi he
A poi lo ee Chan Uk Thang

An Iang kho lo, phuntungtu
Deirel arfi, na hngalh ko
Chun ah ceu ngai lai ai cih
A poi lo ee Chan Uk Thang.

Kan fa dawt mi, Chan Uk Thang
Na sir ah hin, dir kamh tu
Rel cawk lo in, arfi bang
An in philh lo, na tuan bia
Na tuan bia nih, phuang tthan lai,
A poi naisai lo ee, Chan Uk Thang

Na u na nau, an tam ko
Rili raal le peng chung ah
An tthang thliah mah, len ko hih
Khuadei lai ah, mui khun tawn
Thaizing ni ttha, chuak cang lai,
A poi lo ee Chan Uk Thang


Nang le na u nau rual cu
Nan phuah te lai, lung bia neem
Nan pa le kong, ram hla in
A poi lo ee Chan Uk Thang

Nan chan lai ling , kaan hngar hna
Hngar awk ttha lo, kan nih chan
A poi lo ee Chan Uk Thang

Tto tho ruah le ni lin cu
Meifaar vaang le , siang inn ah
Na ser te lai, kaa ngaih ko
A poi lo ee Chan Uk Thang

Na pa a kawi, kei bang cun
Maan zu tu cu, tawng hrim hlah
Na theih cang ko, a ttha lo
Kan luun bu in chi baar laang
Thawl Iang hrai hneem, kan herh lo
A poi lo ee Chan Uk Thang

Duh hlei ttha cuang, duh cung nung
Ka duh a ceu a maw lo
Pangpar tthi le Chaw HLAWN nih
A BORBOR in, hngaah CIN ai
RAM PENG peng tu, si awk ah
Nang mah TAWK in, na CUNG ko
SUI na KHAR lai,mi hmai ah
KHUA na UK, lai na LIAN lai
Cungchin ZING CUNG, mang bawi nih
A kan ngiat ko, philh hlah mu
Zoh hmanh ni a chauk cang, Chan Uk Thang

PPP.
Thunder Bay

KA DAWT KA TTA

Zei ralkaap hen, Chin ralkaap ta
Zei miphun hen, Chin mi hen ta
Zei tlangvaal hen, Ngaknu hen ta
Zei dah na lawh, Ka tthawng tuk hih

Rak ka philh hlah, Na um naak in
Rak cawng peng ve, capar saang kha
Rak i hne ve, Hmai lei caah
Rak ka zuum ko, Kaan philh lo hih

Ka meithal hi, a tlolh bal lo
Ka kah peng hna, ralkaap cozah
Kaan kuh kaan hnamh, ka zaan mang ah
Ka mui bel te, Iang lawng a taang

Ka ti a haal, ka tha a baa
ka dang a caar, Ka khua a sik
Ka tak a lin, Ka calthlan he
Ka in khawh ko, ralkaap ka si

Na far nu hi, ka duai lo hih
Na ning zak hlah, ka dawt ka tta
Nang caah kei, Kei caah nang
Nau dawh hrin hniang, Rian peh tu ah
Kaan hrin piak lai, Nangmah thlaak bak
I ton tthan hnu, thla kua hnu ah.

( CNF nu raalkap hna dirhmun in)

PPP.
Thunder Bay.

SUPSAP SUPSAP"

Hmun zakip ah, Supsap Supsap !!
Tan nak laihri, Philh hlah Lairam
Cinrung Vuichip, Vankau par in
Thlizil an hrang, Khonumthung tiang
Eng cicia in, I love Chinland

An tlo tuk hna, Thluk lo tar-no
Hacangrial in, Kan hluan sal chan
An pulh hnga lo, Rumro bawi rual!!
Thlang vai vangah, Kan haal fimnak
An phun an zai, Supsap supsap!!

Tluangchin za dan, Vai rual ram ah
Au len kan ser, SOS ti'n
Lungfah aa phua, Mitthli rual he
Apoi ko dah, Sem puak cawi he
A dai hnga maw, Supsap supsap???

Hnah tthing tthilh in, Izirh laang kaw
Rimnam sachia, Tleeng tthu hmanh ngai
Par tlaan kel ve!! Lailun valttha
Let ning ka biar, Chinhills caah
Ka'n philh lai lo, Kadawt Lairam
Ka'n ven peng ko, An au Vakok
Ka theih an phai, Supsap Supsap !!!!

BY: Salai Dingdi

Herh Lian ka zau zawn ah

TUZAAN CU; By Zung Iang ( Phan: Dawt Ceu)

IANGNGEI KHUN & PASAL

Ka chuahpi farcan iangngei khun,
Mithmaipanh tein khuptthi rual sinah lentti caan kha,

A sungkhun kan phai bianem thlibia, honih iang kho hrim lo in,
Kan lentti tawnnak khuazung chumtual dawhah,

Kan cim hrim lo tiin iangngei khun he kan kutzanem tlaiin ,
Kan biakam fekchin seh tiin thlazacam tti dai hin lo in,

Vakok nupa bang chanchung leng tti ding in kanphai tawn kha,
Nuam in lengtti in honih iangkhotu an um hin lo tiin len tti can ahhinmaw,

Tthennak PASAL kongcu kan karlak ah rung leng in maw,
Nang le kei tthennak dar cu rungtum hna in,

Ttian maw kan si kunlai ka farcan iangngei khun aw,
Kan cim hrim lo kei ca'h a sungbik iangngei khun ,

Kan siang hrim lo kei ca'h nunnem ka chuahpi farcan bangin,
zeitiawk ttha lo iangngei khun na liamnak ding nii-caan cu ,

Rungphan chin lengmang cang mu tleihawk ttha lo in,
Sunghno nupa mithmai ah asung khun maw PASAL phaisa,


Dawtmi iangngei khun aw tthen cu maw kan si tak ko kun lai,
Na kutzanem te cu ka chan ta law na tta santlailo chanchung lung hnangamnak ah,

Vungliam ko hmanhlaw iangngei khun aw nang le kei cocan ah,
Kan techin fapar tal i tong hram hnaseh tiin,

Thlazacam dai hin hlahusih tiin maw na liam kun lai,
Tlaih awk ttha lo maw PASAL phaisa ruangah nang le kei ttian fah cu,

Maw ka dawtmi iangngei khun kan siang hrim lo tiin,
Tlaih awk nih le na ttha fawn ttung lo,

Sianlonak mitthli tla buin liam ko kun mu ka farcan iangngei khun aw ,
Na tta cu khuachum tual dawh ah kei lawng in rak leng cang lai mu,

Uu le nau ngei lo [Thahreng] te bang,
Na tta cu rungvai cang lai..

Khah si le sianlonak mitthli tla buin iangngei khun aw liamzal cang ai mu,
Ka sianlomi iangngei khun aw mangttha kun mu ,

TUAR HAR KHUN
PASAL in nang le kei ttian fah cu,

BY .. Salai Biakhleisang
Malaysia

KEIMAH LE LUNGKUAINAK

Lungkuainak nih,
Ka hmaika ah dir in a rung phaan.
Ka intuarnak le mitthli hmuh a duh caah
Daite'n a dir. A ka ngiat!
Mirh nawn in ka ni.
Nunchung philh lo ding asi ruang ah, ka ni.
Cu le cangka,

Lungkuainak nih
Thinlung kutka cu a rung kingh.
Nihnak le tahnak karlak ah hmun a khuar.
Khulnuar nawn khin innka ka awn.
Nunchung umding aa timh men lai caah, ka awn.
A keneh ka hnawt duh lo.
Phanah aa phoih ve lo.

Lungkuainak nih
Laksawng a rung ka put.
A hmaika ah ka awn.

Dawtnak he ka nunpi mi;
Lih le hrokhrawl asi lomi;
A rak ka khirh thanmi -- dawt-el-nak
Zumhnak, ruahchannak le conak ca he,
'Thaw' a chuahmi ka thinlung put
Zeizong vialte khirh than ka si mu ...
A ka co hlang bak lo mu ...

Lungkuainak nih
Mitfang in a ka hmuh tikah,
A tap rua, a aw tial.
Lo diam zaam.
Kei bel mirh nawn in.
Innka bel hrenh ka philh ve rua ...

By- kevin thang

TINHMI THEIPAR

Dairial cerh tidil sin ah
Khulrang ngai in an kal ko hna ta,
Zingdap tlaak ka in kaa thawh ve ko.
Ka sining nih fum tuk kaw ...
Vankamkil a pit riangmang.
Zan thlapa a rung mang riangmang.

Tidil cung ah a rung tlami, thlatangnu
Ka vanram cu bi tuk kaw
Kawp ngeilo he ka tahchun.

Ti thanmi an tian hnu ah
Cung thlapa thlaamte ka bihzun.
Dawtnak cu dairial ti bang ...
Tilet tho lai phan ah thaw zong dim.

Sihmanhseh!
Vawlei dang
Tidil dang
Rili tiang a hmu khotu, thlatangnu.
Cerh tidil ah ka bihzun.
Tidil pin ah a thla a zamh hnu cun,
Khuaitizu zong a khaat tertu
Zuunhla fungkhat ka hnahram ah,
Dai te'n aa hngilhmi thlizil ka hlau sual maw?

By- kevin thang

NUNNAK DOT-HNIH

Fimnak cu cauk chung ah a um.
Cauk a eitu
Phihlik,
Tuanbia ah a fimbik ko a lo.
Maimomh chuncaw men si.

Inn tha a tiammi
Maimomh,
Rawl a khong lengmang.
Kingro ngai in khua a sa.

Nunnak dot hnih,
Mei hmih hnu ah zei dah a tha hlei.


By- kevin thang

THAPHNIHNAK INNKA CHUNG' BIA

Chimpit-vansan in
Ruahchannak ninem a ziam
Aanka nemte zong.


By- kevin thang

THAIHLUNG MANG II

Caku cung suaimi pelep a zuantertu
Dum pangpar hna zong nih an tlaihchanmi
Vul phak lio ah ka rak in hmuh kha ...
Ka lungtlap ah ka khonmi dah ti lo,
Keimah he zeizong za an i hlaat dih cang.

Ka mang ah,
Maw nawn in ka sin na ra,
Piang te in naa her i na kal than,
Zungzal i hlaatnak ri piinlei ah.

Kaa hlau!
Caku cung suaimi pelep
Biangki sente nih a zuanter diam cang.
Kaa lungsak ko.
Nain ...
Daite in le dinte in a kalmi ko nih lung a hlau.


By; kevin thang

KA PHAI HLAH UH KA PASAL HAWIHNA; RUAT!

Kan rum caah maw ramdang kan phanh kan fiim caah dah
Zingnu hlanh chawmmi ram ah phan hnamaw lai pasal tha
Thihnak lei lam maw kan panh nunnak lei lam dah..Ruat

Ka me hlah uh ka pasal hawi hna, Kan biak zingnu sal pei
kan si fom cu, Zohzun hawi nih iang thawngtha ruangah
Chim caan a cu ve cang lo maw? Ruat

Ka pasal hawi hna zeiruang ko ahhenmaw
Ram hlum sazuk hluan in fingtlangkip cul bang
Ramkip panh in kongno thahlai bang mi kuttang ah..Ruat

Kan hmuh bal lo, Rangbawi sercia cabuai cungahmaw
min deu hmang in khuaza cul in kan au kan khuan len ko rih lai
Miphun caah tihnung tuk lo maw? Ruat

Kai nawl lai lo, Khrih le ka miphun caah ee
Rang bawi zungthiam le zingnu min cem chih in
Tluang ka khawng ko lai, Thla zaacam buin


By:Lai Kam Thang
Malaysia pudu

DINGDI

Par zaa lakah
Ka bihzuun hlei
Ahohmanh nih
Cuai kho lo ci
Kei thinlung ah
Cuang khun ai ci
Dingdi Pardawh

Merem loin
Tintling cungah
Nang kong ruat in
Ka phai lungduh

Tlengkhat thumi
Vanva bang in
Dawtnak puanki
Zawnh caan hngak in
Lungkil dawtmi
Dawtnak hriam in
Kan ven theu lai
“Dingdi Pardawh”


By; Holy

PA PA

Kutzung KHUAZING Aa dawh ko dah!
Hnakkar a caam PA ter Adam
Sin cun pei maw Sem a ser kha !
Ka chawr cemmi Hringtu "PA PA"

Panh siarmar in Phai len ser hna
A cuang an ti "NU" thisen ah
Thlapa thlakua Hngahhlang hnuah
Ka chuaksem ve "PA PA" thawngin

Khuplawn tualleng Kaa pau ter kha
Ttialmal ka hlam "Pap pa Pap pa"
Siangniam kai zawn Phai dai bal hlah
Ngal-eu kei-vom Va tong ai kun
Ttih bei hlah ieee "PA PA" um ri!!

Semthar parbor Bochan ttanghngat
"PA" si ve ding Thlan-ti thin-lung
Ngeih le chiah he Lam ka hruai maw
Kum thluan chuak in Deirel a hluan
Ngun-dar hraanchaw Sui le ngun nih
An hluan pek lo "PA PA" dawtnak
Lungkil ne caam Ruum le raa kha!!

Ka chiah ZISUH Chang ah "PA PA"
Ruul kho hlah ee Chimhhrin ann kha
Vuai ka hngal lo Sih tlanh khi bang
Cung Khuazing nih Thluachuah seh mu
Ei !! chim rih laang Ngaihchih um lo
Ka zawng ve hmanh " Pap Pa, PA PA

BY: Salai Dingdi

KAN NGAITUK

Ka thinlung cu zeitik hmanhah aa thleng bal lo
Nang lawng kei ca dawtmi
Nang lawng kei ca thinhnem kho tu
Umkhuahar in kei lawng maw
Lam hlatpi tiang na kal hnu cun
Kaan ngai tuk, Dawtmi


Henry Hram Sang

SALAI TAANTAKMI MAI KA SINING

Nika cu aceu
A zungzal in
Amaw chialmal mi thlapa cu
Zankhat hnu zankhat a maw chinchin
Zeitindah si hnga

Kei ka thinlung
Caankhat lio ah khan
Ceunak in a rak khat
Asinain
Tuzan cu
Muihnak in a khatmi
Thlapa bantuk ka si ee

Salai...
Nanghe kan i then cang tiah
Zanmang ka manh zawnah
Nika aw tiin
Nazing niceu nih ka thinlung hi
Salai sinah ka cawi law tiah
Saduh ka that tawn ee

Ka ngeihmi duhnak vialte
Nangmah kan pek dih
Zeihmanh na rello si ko lo maw?
Ka theih ding a si
Natein..
Duhnak a rimi
Keinih zeitindah
Ka theih hnga mu

Misur zuu (wine) hraikhat he
Kan duh nak vialte hi
Meng tam tuk a hlat cang

Kamit in a luangmi
Kamit thli hna hi vanruah ah
Van i cang sehlaw
Ka thinlung he
Aa then dingmi Salai hi
Kallo ding in kham ka duh ee..

Mai Senripar

KAN TAR SUALLAI

Salai zokzok tein
Iduh usih
A caan aliam tuk cang hih.
Caan a sau ahcun
Kan pahnih in kan sunglai
Kan nonak le kan iang vialte
Anlo cuahmah canghih
Zingnu pekmi thil hna

Acaan a rauh tuk ahcun mu
Pasaltha nasinak
Namui le navun hna
Anzor ankor dih lai hih
Nathin aphanglo maw?
Nasam hna an rang pah cang
Amirh pengmi namit hna
Tikhal bang ankik dih lai
Natar suallai na tih lo maw?
Salai!

Cucaah cun;
Aliam ciami caan hmanhah
Na busy pengmi kha
Atharlai dingmi
Thaizing vialte ah cun
Nunzia, Duhzia thiamcang usih

Nangmah le nangmah
Naa dawt bang
Rak ka daw ve law
Nang nih
Thil pakhat na ka pek cun
Petu na si bang
Aa laaktu keizong nih
Ka sunghmi a um ve ko lai si
Salai Busy tukti hlah
Kan tar suallai

Maisenripar
Thantlang

TTANGRUAL USIH

Kan khua kan ram Bawipa caah
Zohchunh tlakin, kan nih mino
Tang rual usih

Rimhmui par bang, Bawikhrih caah
Kan nih mino, Par ve usih


Lei nun caan tawi, Khrih sunparnak
Karh chin dingin , kan nih mino
Ttang rual usih

Teirial thlu in lungrual hmainor
Bawikhrih caah, kan nih mino
Tang rual usih

By.. Hngalhlo
( Carson mino biaruahnak chungin lakmi a si)

ROSUNG

Semnak ram, lennak tlang
Lungah a taang
Thluak nih a philh kho lo
Nunnak nih hlammi lairam

Thli thiang hrannak, ti thiang luanak
Caanrel vaphun tlingnih hngahmi ram
Aadawh pangpar in ttamhmi hmun
Laimi caah lairam asungbik

Ti ngahring dawi le, kehthei hrawn
Mangbawi fanu vaalrual keng cung puak in
Hovan ngai lo nuamh serh caan hna kha
Laimi caah lai nunphung a thlum bik

Lairam caah lai pasal
Laimi caah lai nusal
Lai chungchuak, lairam tthang
Lairam nih laimi ttheu zumh in a bochan ko

Rumnak in cawk ka tim hlah u
Suingun chawva in thlen ka tim hlah u
Tthutdan saang le mangbawi inn chung um nak hmanh in
Laihritannak Lairam ttheu kaa thim deuh ko hnga

Pupa hna nih dinnak in ukmi ram
Zingphung ah aakawmmi kan miphun
Suingun rumnak nih cawk khawh lo
Fimnak ngei lainu sal pasal lennak ram tu ah ser in len timh ai laang


Cung Lian Thawng
Hong Kong

CAANKHAT LIO DAWTMI

Zoh dawh ngai in
A parmi pangpar
Hun zoh zawnah
Ka lung a leng
Zuuntthing a thar

Cung van sang i
Arfi le thlapa
Hun cuanh zawnah
Philh khawh si lo
Zaankhat lio kha

Kumtin liam in
Khuacaan aa thleng nain
Ka lungthin in
Na liam rih lo
Ka ruahnak in
Na chuak rih lo
Caankhat lio dawtmi

DK- LR Mawi
17.05.10

THINGRAM HNAH

Fingtlang cuanh ah
Thingram hnah nih
A thar in an corh
Ka thinlung bel a tthing rih...

Lunglawmh tertu
Vanva hna cu
Zaihla sa in
Lawm in an zuang

Fiakfairok nih
A awnh zawnah
Philh khawh loin
Lung ka hlau tthan
Liamcia kan caan

DK.- LR Mawi
17.05.10

MR. PISTOL

A mi pum nih
Fa dildel in
A tuntai nih
Niam dildel in
A bia kaakhat in
Mi a that tu
Mr.pistol.

"Meithal lo cun, raldo zong ah teinak lam a har"

02.05.10


dktluang

HNA CHEH LOCUN BIA NGAIHDING

Biachim nak ah
Kaa zong ka ngei
Na biachim mi
Ngaihnak ding ah
Hna zong ka ngei
Nain, nang cu
Biachim nak ah
Kaa na ngei nain
Bia ngaihnak ah
Hna na ngei lo!!

”Chim ko zong i, ngaih lo ahcun san a tlai lo”

05.05.10

DKTluang

TTAP HLAH NING!

Ttah Ni
Zan nih,
A hun phak cun
Cenghnia a ni
Arpi a tap.

03.05.10
"Ka nih cu, ka ttah lonak ding ah asi"

DKTluang

LUNGCHUNG BIA

Ka mit in
Ka hmuhmi thil
Ka hna in
Ka theihmi thil
Ka lungchung ah
A ummi bia
Cu bia hna hmanh
Chim ngam loin
Mifir bangin
Aa thupmi kei.

“A thu cang mi thil cu ei ngam asi lo”
05.05.10


DKTluang

ATU AH CUN

Na liam a tuan ka nu
zaanmang a si lo
Fak khun ka tuar.

Laa bang zelh awk ttha lo
Hnukthlum dinh lio caan
Lawmhbia chim thiamlo
Semmawng lioah

Hnukfang seh ton zongah
Thinhung thiamlo na ka dawtnak nih
Ka paw na khimter zungzal

Na dinhmi na hnukthlum thawngin
Tthanttha in ka tthang
Ka paw kaa cawm

Hmanhseh ka nu
Nanglei mer, kaa theih a thlai
Ka kawl ngunsawm
Ei menh ta lo

Na liam a tuan
Kei lungfim hlanah

Ih zaanmang talah
Rung lang ta law
Na rauthla talin
Na dawtnak bianem
Theih tthan ka duh.

Hmanhseh atu ahcun.....

B. Bawi Mang
GR, MI
U.S.A

THLARAU LAIHRI TLAI

Nu hrinfa ka si nain
Mi hrinfa cu ka si lo
Chiahrin fa ka si nain
Bawibik van hrinfa zong ka si
Ka nu zumhnak thlacamnak thawngin.

Nu hrinfa ka sinak nih
Minung nasi aka ti
Hrintthan (vanhrinfa) ka sinak nihcun
Pathianfa nasi aka ti
Voi hnih hrin ka si caah
Kai lawm khun tuk e ka nu.


Nule nih fale dawt cu
Vulei nunphung asi i
Hrintthanmi nih (Khrih) thlarau dawt cu
Thlarau (Van lei) nunphung arak si
Nu lak ah thluachuakbik cu
Khrih apawitu nu hi nan si.

Elizabeth pawchung in Johan nih
Mary chung um Khrih kha a lomh (Luke 1:41)
Thlarau in an rak ichawn i
Nuhrin lakah liannganbik le
Sualnak vialte akalpi Tufa zong (John 1:29)
Vancung pennak kong an rak phai tti.


An awih tawn hna nule nih
Ttah ter siang lo in fale cu

Hrin tthan asimi Khrihfa (thlarau) bel

Zohkhenh tonglo hngakttah bang

Ttaamhal in an ttap tawn i
Cathiang nih cun tihin ati
Thlarau hi ttah ter hlah uh (Efesa 4:30)
Nule/fale nak hmanh in daw deuh uh (Matthew 10:37).


Phai tti sih Khrih le nule dawtnak
Nunnak pa hnih ngeicio pei kan si
Nuhrinfa kan sinak cu
Nikhatkhat a dong te lai
Van (Thlarau) hrinfa kan sinak bel

Zungzal a hmun ding asi caah

Nuhrinfa le vanhrinfa
Thlarau Laihritlai kan si tihi
Zungzal dairi ah ttial cio sih.

Lungtlaitlan

KA NU DAWTNAK DAH TI LO CU

Vanrang tang um thil vialte cuai ka thlai
Mangsung bik thil hmanh rak chuahpi uh
Minung holh nih a tah khawhlo thil ka hmu lo
Hringtu ka Nu dawtnak ti dah lo cu…


Chim nih a tlinh lo, rel nih a zaat lo
Thuk in a saang, thlum in aa dawh
Mah caah aa hlawkmi zeihmanh a um lo
Fale ca i pekchanhmi dah ti lo cu…


Fimnak a ngei lo tiah ka zai lo
Thiamnak a ngei lo tiah ka mawhchiat lo
Hawi a tluk lo tiah ka ruat fawn lo
Keimah caah ka Nu ka duhbik ko…


Vanram hluan in lennak ramah
Chuangthiam hna nih chuanmi rawl
A tleu aa dawh, mithlaang tirawl ka ei na’n
Ka nu chuanrawl ka hlam bik ko…


Caan nih liam in chan ii thleng hmanhseh,
Fimchan in suichan tiang
Zeithil hmanh nih tluk in a rulh khotu
Um ti lai lo hi vawlei ah, ka Nu dawtnak dah ti lo cu…




Cung Lian Thawng
Hong Kong

DUHTHIMNAK NAWL

Na lungthin muru ah
Sahrang pahnih an tlong.
Pakhat cu huatnak he a khat.
Pakhat cu dawtnak he a khat.
Tam deuh rawl na pekmi nih
Na vawlei a bitkauh le
A thlum-al cu a fianh te hnga...

Mi kong a ceih tukmi hna le
A dai tukmi hna sin ah
Na lungput cuai va thlai hlah!

Na lungthin muru ah
Sahrang pahnih an tlong.
Sa vokhat na ngei,
Hodah na pek deuh lai?

Kevin Thang

DAWTU KA NU

Vorh rih laang ee nunnak pek tiang Dawtu
Ka nu na dawtnak kong
Cuul dih sehlaw
Kan len Lei ram in
van suikhua Lipi tiang
Thang luai Mai sseh
Surhan thlu lo ttuan zai na rel
Ka ttiattum lo na ti zongah
Na nun naa hne
Ka zawn ruat in
Rawlthaw-Meh thaw hmanh
Ei na suum tawn kha
Nu vialte lak cung nung na si
Ho iang khotu an um lo
Na aan cing lo ka um caanah
Aw nem tein ka fa na ti
Aan ka thlum le nuncan dawh he
Ka nun a cawmtu hringtu ka nu
Na fa kei nih thinlung takin
Na ka dawtnak zeitik hmanhah
Cham khawh ni um ti lai lo
　
Hniang kung thang

KEI KA FA BEL A BAU LAN AI

Khupthal leh ah, aa thawh ve khah
A nu zaanriah, tep manh lo in
Tio raal a pet, Khuptthi rual he
Nun ttian a ti, a nu a ttap

Lam chosaang le, horkuang thuuk hna
Ttotho ruah le , ni lin khua al

Rak thei thiam uh, ka fa pa kha
A tong bal lo khahlaan caan ah

Ni thla an liam, kumhra reng lo
Fahniang zuun in, a nu a ngor
"Ka fa khoi hen, Na ka kal taak"
A nu ttah hla, Ro a ling tawn

Nihin nicu, Iang na ngei dah
Pasal ttha hna, tlun ni ciammaam
An phurh an ti, ZALON naak ro
An lomhpiak hna, Ram pum huap in
Leeng no sazuk, Dongtu ttha hna
An laaam an kui, Ni naa ttap naa
Hei cuan ve laang, Fa pa hniang cu
"Kapa i sum", ka hna hram ah
Ka hei ngiat i, A hawi pa cu
A ka kuh ai,"Thih ttian a ti"

Zual ko ding in, a nu dinhnaak
Thlaanmual panh laang, Na fapa hniang
Donnaak ni ah, Aa tel ve lo
Kei ka fa bel, a bau lan ai.

*Ram ca ah a nunnak a pe mi unau hna caah*

PPP.
Thunder Bay.

KA NU DAWTNAK

Ka NU na dawtnak nih pangpar
dangin run en hna....?


Fa le kha kan no lio ah na thla
bor tangah him tein veeng
tawn hna maw....?


Fa le hawi sinah mithmai that na kan pe tawn kha
Hawi sinah na kan dawtnak na langhter i
Fahniang tiah na kan auh tawn kha....?

Ka Nu fa le na kan dawtnak aw men nih
Hawi le sinah hmaihngal ter tawn maw....?

Zeitik caan paoh ah fa le caah
Retheih na tuar tawn kha....?

Retheih na tuar lio caanah
Fa le kha dawtnak aw nem in
Fahniang tiah na kan auh i
Na retheih na philh tawn kha.....?

Fahniang nih thatlonak kan tuah lioah
Dawtnak aw nem in thatnak in na kan leh tawn kha....?

Ka Nu fahniang le na kan dawtnak hi
A sungin a thlum tuk ka ti...?

Zeitik tal ka NU na dawtnak hi
Fahniang rualnih chamkhawh ti
Um ti lai lo ka NU na dawtnak hi....?

Na dawtnak hi ka NU mikip nih
Co cio hnasehlaw
Mikip nih thlachuah NU tiah
In upat ko hnaseh...?

Ka NU na dawtnak hi
Fahniang rualnih kan chan chung
Philh ni cu um ti lai lo
Ka NU na dawtnak hi
Fahniang rual caah a sungin a thlum
ka na dawtnak hi...?
Ka NU na dawtnak hi fahniang rual caah a sunglawi tuk ka philh kho lai lo...?
Ka NU na dawtnak hi fahniang rual caah a thlumtuk ka ti ka philh kho lai lo....?
Ka NU na dawtnak hi fahniang rual caah thlachuahnak asi ka philh kho lai lo.....?



Evan J.Ceu Mang
Malaysia

CHAM KHAWHLO KA NU DAWTNAK

Kum le caan cu aa thleng nain ka nu na dawtnak cu aa thleng kho lo
A sual cuahmah mi nafa a ka hlaw lotu kanu na dawtnak hi
Nikhat hnu nikhat in a thlumchin lengmang
Nu vialte lakah aankaa thlum khunmi ka NU

Sui le ngun zong in ka NU na ka dawtnak cu tahchun awk a tha lo
Semmawng kasi lioah na aanthum le na biathlum te cu ka hnathlam ah a caam
Kafa caah cun tiin vai lian ral hmanh pah na rak ngamh
Philh khawh lo sunghno ka NU

A ka dawbik tu sunghno ka nu nafa ka caah hin naa dawh khun
Na sampar faa khat hmanh ngun sawm zaa in cawk khawh si lai lo
Sunghno ka NU naa dawhnak iang hi nafa ka mitah cun;
Zeibantuk Fidi zong nih an in hluan lo

Ka NU nafa mitthlam cuangkhun mi cu
Ka fa caah tiin zanttim ah kokik ring tiang theih in thlazaa na ka campiak
Na fa rawltaam lai phanah sikngen ar khuang in na tho i rawl na ka chuanpiak
Cham khawh lo NU dawtnak thlum bik

Ka NU na ka dawtnak sungbik cu
Kan biak Pathian nih nafa hmang in na retheih philh caan um te ko lai
Ka NU!


Lai Kam Thang
pudu K L

A SUNGBIK

Siarem in ka um caan i
Hawittha ah ka ruahmi hna cu
Harnak ka ton lio caanah
Ka kiang in an ttian theu tawn

Chosang ka kai lio caan i
Hawittha ka ruahmi Meiro
Chokhat hmanh ka chuah hlanah
Thli sinah a liam theutawn

Lamttha hmuhsak tu ninu
Thilnung vialte lamhruaitu
Ceunak petu cerlian hmanh
Suimilam hleihnih hnucun
Zaanmui chungah aliam theutawn

Harcaan fawicaan tuak lo le
Daihcaan linhcaan zong thiim lo
Ceucaan muihcaan hna zongah

Ka kiangah a dirpeng khotu;
Ka NU na dawtnak nakin
Asungdeuh mi thil zeital
Sermi lakahhin an um hnga maw?

Zathawngcin

A HNINGHNO PENGMI DAWTNAK ( NU)

Van khi cimin
Rilipiti khi reu dih hmanhseh
Nu le dawtnak a reu ti lai lo.
Khuacaan hna cu imer in
Minung tuanbia cu i thleng ko hna hmanhseh
Nu le dawtnak aa thleng ti lai lo
Vaan le Vawlei
Vawlei chawva
Vawlei tthawnnak
Cozah tthawngtthawng
Vawlei Hriamnam
Hna i an tthawnnak
Vawlei nunnak vialte le
Sermi thil vialte hna hi
Nikhat ah an dong te lai

Siseh;
Nu le dawtnak
Donghni a um ti lai lo

" Sunghno ka NU
Vawlei in sermi na pum cu
Caan sinah tarin uai hmanhseh
Na dawtnak kan ca'h a uai ti lai lo"

Zathawngcin

SINAH

Lungrawn khua chuaktak in maw
Tlangza culin ramdang ah ee
Faakkhun ka ti tluangdang phak hnu,
Semnak zuun tuarbu rianhraang ttuan cu

Zei ko nih maw tthenter ai hna
Tthen sianglo Lairam le maw Laimi hna
Hnemtu ngeilo hram rih kun law ka Nu
Na hrin seihno hna lungthlitum tlin hlan cu

Phengtu Cinrungtlang le maw Zinghmuhtlang hna
Lungtthul hlah law khuadei caan phaakhlan cu

Oh! kei zong kaa zuam zingdoi cuan in ee
Hmuhlo tlang phen USA ramin ah

Tthentu Pa Tan le maw Ngaleu rual hna
Lungkhong ko rihlaw suikip chutin hngawngawh Na ton hlan tiang

Tthentu Pa Shwe le Mahkap rual
Kei caah ka ral
Phuangtu Capar le maw Biazia kei caah thazaang

B.Bawi Mang
GR, MI
USA

Sonnet 518

A bii nawnte a mit a nii
Biathlum lawng khaih hmangmi, a hmur sente;
Tidongkhar caan ah a hmur phi
Vawlei cung ah muidawh bik asi lo.
Thintor a rantertu, velngeitu asi,
Val zakip caah zanmang uktu asilo,
Chungkhar nuamhtertu ding nupi-rua asi
Manh caan paoh ah a muithlaam, lung ah cuang.
Nunnak lamthluan ah, lamphawk umlo zong a fiang
Lengti ding ah tinhmi a sang; ka chung kua
Sathi luanh in, kut an ka sih kanh lai ka phaang
Aa raalkahmi hla funghnih, ka thinlung ah aa vua.
A rem theng lomi nunzia vialte hlawt kaa tim,
Ruahchannak he ka dawp cang, hi dawtnak rim.

- Kevin thang

PHUHRUN

Biakam ka buar
Lung a buar;
Ngaihthiam hal ning
Ing ko ning;
Ka lung ka purhdah hlaan ah,
Thlatang nu cu liam ai cang.
Cerlian ninu
Tuni cu;
Ka chuncaw ah cang ai kun.

Kevin thang

"HNEMTU UMLONAK KHUA I TINGTANG THAWNG"

Kan pahnih in tian ding kan hna a tlak asi ah cun
Mitthli a hai kho ti hnga maw?
Na biangki sen tete an dum hliahmah cang mu
Ka thinlung zong a duk ve ko.
Kan tian ding rak thei ning law
Thei ve law ...
Kan rak i tong hnga lo mu.
Duhdawtnak ah palh khawh asi lo bang
Nangmah ka rak in dawt bang
Naa beek nakding tang-lum kha;
Ngaihthiam khawh i zuam peng mu.

Hnemtu umlonak khua ah,
Dawtnak a zor an ti maw?
Caan saupi tiang ka khonmi dawtnak hang vialte
Zeitindah, zei sullam in dah ka thleet sawh lai ...
Caan zong ka caah siibawi si theng hnga maw?
Tian ding cu hnatlakpi na hau ti lo mu ... thinhnem.
Kan rak i hmuh caan i 'mangtha' le
Atu, ka dang ah, a taapmi 'mangtha' ...
Cafang fonh in chim siseh law;
Ka tingtang hri a cat hnga lo.


-Kevin thang

HMUNTHURKHOR BIA

Thinghnah tilh caan ah ka chuak
Rua hmunphiah thawng in an ka thlim
Lungkuainak pinlei ah
Lungthin a thar than an ti maw?
Hnahthar corh bang an thahchunh maw?
Tisikun!
Thinghnah tilh thawng ka theih ko.
Mizaw a damtertu;
The Last Leaf tuanbia ah
Hnah hlun vuitu men ka rak si kha.
Thinglung hlun vialte an khangh lioah
Hmm ...
Von i ruat ta ning ...
Remlonak min cazin kengtu;
Huatnak kha
Ziah! nan thah lo?

Kevin thang

A KA DAWTU KA NU

Na dawtnak bia nih
Aka dirkamh
Na dawtnak bia cu
Thinlung ah a caam
Zingnu sin thluachuah halin
Ka hmailei caan caah
Lam na ka sialpiak
Na ka chimhhrinnak bia hnacu
Ka caah teinak
Ralthuam an si
Na biangno cung
Mitthli hna cu
Ka lam caah
Pangpar an cang
Na thlacam aunak
Meiinn ceu bang
Ka lam hruaitu
A sung lawi khun
Vaan ka ngei khun
Na fa ka si mi hi
Leidai tangah
Liamser canghmanh
Philh ni um lo
Sunghno ka nu
Na dawtnak sung

ChinChin(Hniar Lawn)
Michigan state(U.S.A)

NU LE NI

Hringtu Nuni
Ka ruah lengmangah
Ka thei kho lo chinchin

Ca an tialmi ka relah
Ka lung a buai chin

An chimmi ka ngaihah
Ka lung a piang lo

Ka tial ve lai ka tiah
Athok zia ka thiam hrim lo

Hla in ka sa lai ka tiah
Ka aw a chuak lo

Ka ttahpi lai ka tiah
Ka mitthli a tla kho lo

Hawi ka halah
Ka ruahnak aa dang

Ka chimh ve hna lai ka tiah
Ka ruat kho lo

Ka Nu dawtnak
Chamding ka thei kho lai lo
A thuk tuk hringhran...

Lai
Notting hill Gate
London,Uk

IANG NGEI LILY

Rimhmui pangpar
Nang he kan i hlaat hnu
Zeitik rimhmui
Ton tthan caan khi
Umte hngamaw?
Nang kaan ngeihah
Ni hluan zei tiang
Ka hraam rih lai
Nang he len ti caan hna
Mitthlam cuangin
Thinlung a zaw
Ih zanmang tiangin kaan ngai
Nang he nuamin
Dawtnak biaza
Phai in nuam te'n
Len tti caan hna cu
Tuanbia an cang ai cang lai
An chim kawlrawn
Va phan hmanhning
An iang kho lo
Iang Ngei Lily

Anthony Biak Ceu Thang

KA NU

Sunghno ka nu, in hlam hmanhning
Na um ti lo, hi lei cungah
Na tu na fa, an tthang thliahmah
An in hlam tawn, kan pi cu tah

Ka ngeih a chia, Hi celngel cu
Ka ti zawnah, mitthli a luang
Na rosungbik an I ken ko
In pa chaktlang, zawnruahnak kha

Tthahnem nakcun, Chia khawm naa thim
A tu lawngah, a cheu ka theih
Ngakttah buangro, Siaherh thiam nu
Ngakttah thluachuah, tawidor nun thiam(Nangmah ruang ah)
Nupi vaan le pasal vaan tiang (Kan Vaan a ttha)
Cu vialte cu, nangmah neh zuun
Rual u pa nih , an theih ko hih
An ka chimh tthan, na Liam ai cang

Naliam ni kha, ka philh kho lo
Kha ni ah khan, ka pa zong nih
Ka Nu a liam, a rak ti phah,
Faa dawt in pei, na rak dawt cu


A poi tuk ee, na chan tawi hi
A mah belte, fim chimh a si
Tu le fa tal, phungthluk bia bang
Na zia tthat ning, Kan I chawng lai
Na tu fa nih, Bia an chim lai
Ka pi mi ttha, tiah
Tlaang an zarh lai, an nunzia in

(Ngakttah le nuhmei na dawt zungzal tawn ruang hna ah khan dahkaw , na kan dinh taak hnuah , na kal taakmi na fa le nih kan theih bal lo mi sinin dawtnaak le zawnruahnaak pin ah hlawhtlinnaak zong kan rak ton ve lengmang hi nihin ni tiang, Vawlei cungah hin tluk awk a ttha lo mi minung rak ka thim ter hnasehlaw , Ka leh ding hna cu hihi lawng hi a si hnga”KA NU” tiah.

PPP
(Thunder Bay)

KA NU

Dairialti nakin a kik
Khuaitizu nakin a thlum
Zilthlifim nakin a dai
Dawtnak lakah sungbik
Asangbik le a thlumbikmi
Chamkhawh lo le rulh kholomi
Ka nu dawtnak a hmun caamcin

Fa le caah
Dinhcaan zong ngei lo
Kut le ke zongnih celh lo tiang
Zanghlei cawitu
Dirhmun sang phan dingin
Ka nunning lam hmuhsaktu
Thinlung kuai le mitthli he thlazacam tu
Rethei le thadit philh tertu
Ka nu iang hi
Tlang chokhlei le senri nih
An iang kho lo

Mai Senripar
24.2.2010

KA NU DAWTNAK

Thadih zaangba ngaiin thlakua na ka pawi
Ka damnak caah eidin naa hneek
Vawlei ka hmuhhlan ah zingnu sinah thluachuah
Na ka halpiak.

Nganfah tuarin nuhrin sen naka peek
Rukkhua hliahcang thlanti puutin
Thlantlangah na dir
Kei nafa ttahaw ka nu nganfah damnak

Hrulhhralh thisen he kei nafa na ttang nemah
Chanh in khuanu vanni bongmal na ka halpiak
Dongcat thiam lo ka nu dawtnak.

Ka pa nih sumser darkhuang cumh bang
An cumh lio caanah mitthli he
Kei nafa ka nunnak hupphenh naa zuam
Chungkhar ah daih le remnak na hun ser tawn.

Nilin khua al lakah kei nafa puak buin
Fale zawnruah ah rianhrang na ttuan
Pasal caah zaanghlei cawiin
Congttial na zuk

Khualtlung mileeng cinglaa rualchan caah
Puitling nusal dirhmun ah na dir
Inn chungkhar ah na mithmai
Ni nu bang a tlang peng.

"Nu chimh co lo zabui lamtlang a ril' phungbia
Na hun ka chim tawn
Khuaza vankil dengin ka nu awthlaam
Kei nafa thinlung meibang an lin

Ka nu na dawtnak kan chamkhawh hlan
Zingnu nih nunkhua saunak in pe seh
Ttap ti hinhlahlaw 'hmuhsung tonhar"
An ti bang thaizing ah kan i tong lai ....ka Nu.

Salai Peng Za Hnin

KA NU

Thlakua chung ngan fahnak
Phunkip tuarin a kan Pawitu
Ka NU

Thlantlang tleihin
A ka dirpiaktu
Ka NU

Nilin khua-al sur thlu lo'n
Zaanghlei a ka cawipiaktu
Ka NU

Mithmai a ka panhpiak
Kho zungzaaltu
Ka NU

Nunnak a ka thaappiak
Ngamtu
Ka NU

Kumkul leng herhbau lo te'n
A ka zohkhenh zungzaaltu
Ka NU

Par lakah cuangkhun
A ka duh piaktu
Ka NU

Ka ca'h nu vialte lakah
Nu sung bikmi
Ka NU

Nu cincih lo pa muangmuah lo
An chim bang, vanhai lo'n
A ka chiatu
Ka NU

Dawtnak lakah dawtnak sangbik
A ka ngeihtu
Ka NU

A kan dawtu zingnu nih
An khaukhihmi chantlung tiang
Kan dirpi ko sawh mu
Ka NU

Salai Tialthawng

KA PUM HMANGIN

Khulrang ngaiin
Kan thinlung mitin
Kaan haam , Dawt

Lihchim bianem
Phainak kaa, lei, dang
Covo kan hun chanh

Zungthiam lo ka kut
Nang zattial tlaihnak
Dikdak ka khuasiksem
An hun chuahter

Baat thiam lo ka ke
Kaan ton khawhnak
Dingah a sur, a han,
A thul ti hriam loin

Na hman tawnmi
Rimhmui thlanrim
Hna kei hnarah
An caam tthan hoi

Naihrawng chungkal
Rualhawi hna nih
An in dawt ngai an ti
Lio caan ah

"Kan hmuh lawngah kan theih
Kan hmuh lo ahcun kan philh'
Na bia kaa khat an hluam


Ngenge theihnak ka hna
Velhle biaruk bukbau ah
Ser kun ai ning,....Dawt

Salai Peng Za Hnin

MAH FAK

Chan chankhat chuahah ifak ve cang seh
A chuahsem hawi lakah a hmaihngal ve ko
Sunghno Nu nih lungfim hlanah liamtak hmanhseh
Apa vel thawngin a khuptthi lakah aa nuam kho ve ko
Semawng ngakchiat lioah mithmai ttha a hmu
A cawn hawi Sunday School lakah thiambik lo hmanhah Pahnihnak tal...

Tthanttha in a tthang siangrun lio zongah cu tho
Theitu an um thenglo a kai hawi lakah laksawng a hmuh lo a tlawm....

Tleirawl hung sikaw taanghra a phan zaapi bang si lo
Cafang cangkhat fir lo mah thiamnak in a awng ve ko....

Ramdang kal a lar; hawi phak a pha US ram tiang
Holhrel thiamlo bik a si lo a cheunak cun a zaa aa ti
Amah cang cun

Hawi theih a thei hawi hngalh a hngal a phaknakah
A hrut a molh ti ko hnaseh a lungsak tho sining zohin....

Tungtai zohah pumrua ttha si hlah hmanhseh
Laitlang chuak cio a hawi lakah niambik si lo
A tung dong nga le a cheu....

Muisam zohah aa rem ti hna hlahseh lengnu pawl nih
A ningzak ballo mui sertu Pathian sinah
Aa lawm zungzal a hawi zohin...
Capo perh a si lo hman te'n aa zaa ve hrim ko
A cheunak tam a hawi lakah zeizong tein aa za...

HA!HA! HA! HA!
Ni chih uh nih a chauh cun; ka ni ta rih lai hahahhah.....

B. Bawi Mang

IANG SAWM

Dawh hlei par cuang
Par cuang iang hlei

Iang hlei duh khun
Duh khun dawt khun

Dawt khun kan thim
Kan thim lungduh

Lungduh pardawh
Pardawh kei caah

Kei caah zungzal
Zungzaal lengtti

Lengtti u sih
Usih ka dawt,,,,

B.Bawi Mang

SUI DAWHNAK ( ha! ha! ha! )

Dawhhlei, ankaa thlum
Duhkip ka cuai zawnah
Ianghlei ka kawl
Parkip lakah...

Cuang khun kan ti
Khuptthi lakah...

Aa dawh anti Chokhleipar
Ianghlei hlah Senripar zong nih
A dawhnak hmel cu...

Lungthin a la
Aa dawhnak nih
A annkaa bianem nih
Thinlung a daihter
Piangrirei a mitau nih
Lung a turter, zanmang tiang...

Chim a phit, aa dawhnak
Lung ahmui, a muisam...cu!

B.Bawi Mang

ZUUN

Caan khat lioah kan dawttuk ve ko timi bia le
Maw liamcia nehhnu tuanbia lungkil ruah tthan zawnah ee
Caan nih a liampi khawh lomi nang zuun ngeihnak hna cu
Tharchuah tthan hawi hna kei lungkil tawne ah
Kei hlei an tuar lai lo an chim Zawltling le Ngan Bawm zong

Thih ttian a faak anti
Nung na'n ttian pei a fak khun hi kei caah eee

Lunglen chaangtu ah siangbah tingtang tum hmanhning
Chapchin hna maw lunglen nak le Dawt zuun ngaihnak cu ee

Tontthan nakdingah Cungzing nih lairel ttunglo
Zeitik tiang maw ka tuar rih lai nang zuun ngeihnak cu ee

I hlau cang ning tilen zongah zaanmang si lo
A har khun ka ti nang zuun tuar le ngaihnak
Biazai ttial cu.........

B.Bawi Mang
GR,MI
U.S.A

KA NGAI RUANGMANG

Fa le hawi zohhngar lai ruahah
Thin thi loin zaanttim khuamang tiang
Khua za ruatin tei na rial kha
Na dawh khun ee sunghno ka nu
Fa le caah tiin thlai na thlak le
Tisik anhnah tom he zing khuasik lak
Zalam hrawn i naa chawh lio khan
Na fa kei nih zei thei loin an donh
Cinkham sang cungah thu hluahmah in ka rak kual
Mithmai panh tein ka fa na ti
Cung zingnu sin ii thluachuah za na hal tawn kha
Na dawtnak cu dongcat loin
Cerhti put bang an luan camcin
Daw biktu ka nu na chuan rawl
Ka ei lo nak khuacaan sau cang
Rili ralin na chuan rawl dum tti lio caante kha
Ka ngai ruangmaang
Na dawt na fa kei nih

Hniang Kung Thang

HEI SI NINGLAW

Cung bongva te hei si ninglaw
Nang na sinah nitin ka zuang zungzaal hnga

Cerlian ninu hei si ninglaw
Nang na sinah liamser loin nikhua ttha petu
Ka si zungzaal hnga

Thlizil nem te hei si ninglaw
Nang na caah a thang bikmi nunnak thli ttha
Ka si zungzaal hnga

Zaan khuamawt te hei si ninglaw
Nang na caah merem tein thlimtu tthabik
Khuasik zandai ka si zungzaal hnga

Cerhti put te hei si ninglaw
Nang na caah dongcat loin fur, tthal, khuasik
Hlan in ka luang camcin hnga .

Hniang Kung Thang

KA PA DAWTNAK

Zilthli kik te bang hrang chialmaal
Ka pa dawtnak kei thinlungah
khuaza vanraang toi lamli in
Nilin chosang thlanhri put he
Tha dih zaangbaa
Na um zongah pa can naa cuh
Fa le caah tiin taksa sifah
Phun tling na tuar
Dawtnak tak he
Tei na rial kha
Tahfung zuhin cuai awk ttha lo
Chambaunak ngei lomi
Ka pa dawtnak
Cham khawh lo ding
Ka ruah zawnah
Faruah thawh bang ka mitkuangah
Ngaihchiatnak mithli an luang
Thinlung chung i ka pa dawtnak
Leilung kih hlan an rung hmun lai .
Hniang Kung Thang

KA NU DAWTNAK

Ka nu na ka dawtnak hi kan cham kho lai lo
Ka fa caah tiin Tthal nilin le khanghnap lakah
Ramking ah ngaidilang na tlik tawn kha
Ka nu saramhraang hna lakah ka fa a khuasik suallai tiah
Pawlking ah Laapar na tlak tawnkha
Lopil king ah kanu nafa ka thawh lo zawn na ruahah anthur keu le kawlhrahri na dawh tawn kha
Ka nu keimah caah vacek sum le horkuang tiangin vomkhuai fano ngei; Tiva ciah caan hmanh hrial loin
Nangmag lawng ningtti le thla phangin ngahring na dawi tawn kha
Ka nu Farbo le tlangkip culin na fa ka caah ca ciahnak a um lai lo na ti i farbei kawlin tlangkip na hrawn tawn kha
Lamkam vabu te na hmuh hmanhah a ti ding siang loin kafale caah ti in na rak phurh taawn kha
A tlum bikmi khuaifung tizu na hmuh zawnah
Nangmah tihal le rawlttam hmanh ruat loin
Fa le caah a tlawt sual lai tiah kutzung in
Na kan phurh tawn kha
Mi lohmaah kanu keimah sianginn kainak caah na dir tawn kha
Ka nu ka hmu, kan zoh ngam lo ee.
Ka nu kan caah thingcia na cheek hmanhah
Thantliing pum khat te le, lakphak tlum hmanh eiding loin ka nu tlangcung khuhlu le,
Lampawng saimuthur naadinh tawn kha
Tluang na tlawn zawn ii thilttha na hmuh zawnah
Na fa le na kan philh lo ii ka fa caah tiah khua za na kan ruah piakmi kha
Kemah sianginn kainak caah na dam lo hmanh I nachuah Sian lomi ngun tangkaa cawng chungah na rawnmi na ka chuah piak rih
Fa le pawttam lai ruahah an phiar khauhrual ser seihnam he tluangkip purphiar ah na cul kha
Kanu; ka fa a ningzak lai na ti ii kawmciar lawng kan ei hmanhah; fa le ningzah lai na ruah ah rawl a dangin na kan chumh piak ii nang bel kawmciar lawng na ei kha
Nangmah nih hni fenhding ngeilo tiangin le Angki hmanh eih ding ngeilo tiangin nafa le caah naa sum ii semsi na khak

Chun nilin le lam chosang na kai hnuah le
Thlanhripi puutin rian na ttuan hnu zongah Ka fa le caah ti in zaan tin thlaza na ka campiak, ceu hlan in na tho ii thlaza na kan campiak
Tluangdang kan um zawnah ka fa le nih khuazing lung an tlinh naklai le
Khuaawng an pemh naklai tiah
Mithli he thlaza na cam zawn kha ka nu
Ka nu lennak tlang dangin umnak I dang hmanhseh
Ka caah thlaza na camnak thawng cu ka hnathlamah
A zungzal in a cuang ii ka ngeih peng ko
Ka nu thlaza kan cam piakin khuazing sinah tluachuah zaa kan hal piak than ko rih
Ka nu na dawtnak hi zei nihdah a tluk khawh hnga?
Zeihmanh nih a tluk kho lai lo
Ka Nu na dawtnak a thlum tuk
Ka nu na ka dawt tuk, ka nu kan dawt tuk
Na fa caah ka nu na dawtnak hi a thlum tuk ee
Ka nu dawtnak

Hringtu Nu le Pa upatnak caah
Ram Dawt Lian ( Ephraim)
Chicago
USA

DAWTMI

Ka thinlung cu zeitik hmanhah aa thleng bal lo
Nang lawng kei ca dawtmi
Nang lawng kei ca thinhnem khotu
Umkhuahar in kei lawng maw
Lam hlaatpi tiang na kal hnu cun
Kaan ngai tuk, Dawtmi

Henry Hram Sang

KHENKHAM HNU SADUHTHAH

Tluangdang hram ttung lo
Sunghno nupa khen hraat cu
Kan dang hram ko usi na ti maw? :(:(:(♥♥♥
Ttahniang nang lo cun
Na far kei hi lei nun a zuam ko lai na ti maw? :(:(:(
Kan i Dawtnak hi dong cang ko seh na ti maw? :L:L:L
Kan tuanbia hi thli bangin thlau khawh si ttung lo ):):)(:(:(:L:L
Dawtnak sem hnu cun;
Sunghno nupa cu rel lo in
Doral lian hmanhseh
Kei nafar kan Dawtnak cu
Hmun camcin seh tiin
Thla zaa cam ka saduhthah..

Lily

ZUNGZAL

Vawlei pumpi nih aa mer nakin aa din
Va hnanih an phanhnak hmun cioin an i din
Nga hnanih ti an i lionak in an i din
A nungmi tampi hnanih an thaw chuahnak in an i din
Asinain a zungzal dinh loin a cawlcang pengmi
Dinh caan zong a ngei lomi
Ka nu kaan ngaihnak ka thinlung

henry hramsang

BANHCHAN PARDAWH

Lenrual lakah ka bihzun par
Na cuang khun ko
khuptthi rualhawi lakah
Na mitttial nih tthuro mit ngei ai ci kaw
Saduh ka thah nang he lengtti dingin
Pa cancuhin phuan timh zawnah
Khirhtthan tawn maw phuang ngam loin
Vaal dang mi he khundim lai ruahah
An chim phungthluk "Ka co lo nih zaang ka zun"
Siseh; Nang lawmhnak ding
Thlaza ka cam
Thluachuah hmu law
"Banhchan pardawh"

Pachan

KAN NUNZIA (III)

"Sanglai inn ah dir"
Na tuahmi thil
A theitu nang
Na ton lai thil
A hmutu Pathian
"Sanglai innah dir"
"Thil cu tuah sual khawh asi;
Nain tuah hraam lo cun tuah sual cu a har"

dktluang
14.04.10

KAN NUNZIA ( II )

"Hmurfung bia laa
Zaangfung tthahnem"
Biachim nih thiam
Zei tuah fawn lo
Na chimmi bang
Hei tling/si sehlaw
Zaangfung tthahnem
Asi hnga mu?
"Chim lawng theih i;
Atuah thei lo hi;
Sual phunkhat asi"

dktluang
13.04.10

KAN NUNZIA ( I )

"Mi lo ah
Zu le zawng,
An i seh," ti mi
Phungthluk te kha
Hun ruah tthanah
A tu lio Laimi
Kan nun/um tu hi
Asi ko lo ma?
"Vawlei cu a thlen kho lo nain,
Minung lungput cu aa thleng kho"

dktluang
11,04.10

NANGMAH VA SI KO

Na chim tawnmi
Bia kha, chim law.
Na tuah tawnmi
Thil kha, tuah ko.
Na um tawn bang
Um law, mi nawl
Va cawng hlah!
Na bia chim le
Na umtu hna
Aa thlen hmanhah
Nangmah va si ko.
"Thlalang hmai na dir tikah,
Na sining cu nangmah tein na theih ko lai"

dktluang
18.03.10

NA THEIH KO LAI

Zeitluk in kan dawt
Ka thinlung dihlak in
Kan tlaihchannak
Na theih ko lai..

Kan i unh caanah
Ka palh lo zong
Ngaihthiam kan hal
Na theih ko lai
Zeitluk kan dawt hi...

Lungduh biaruah caan
Na chim theu tawn
Tlangval kong,
Kha lio caanah
Na theih ko lai
Ka thinhung khah..

Na thei ti maw
Zaan khat lio i
Ka mitthli he
Kan chawnh lio kha ?.

Na theih ti maw ?
Hmai lei kan kong
Lungsi ngai in
Saduh kan thah kha...

DK-LR Mawi

LUNG DONGH CAANAH

Hi vawlei ah
Ka nun huam lo,
Zilthli bangin
Tlang za culin
Si thiam sehlaw
Hraan ve ka duh..
Ka minung hawi sin
Ka nung huam lo,
Zaan thlapa bang
A chel caanah
Si thiam sehlaw
Zan caan lawngah
I langh ka duh...

DK-LR Mawi

KA CHIM TTHAN LAI

Liamcia caan zongah
Atu lio zongah
Ara lai dingmi
Thaizing vialte zongah
Ka chim tthan peng ko lai

"Salai; Kan duh tuk"

Mai Senripar
5.2.2010
Monywa

HI ZAAN

Keimah lawng maw?
Keimah le keimah
Meilul van in
Aho khi ka hngah tiawk thei loin?
Ka tthu ka dir
Coffee hrai hnih
A dai dih cang
A ho hmanh an ra hlei lo
Meilul a dih deng
Amui cang lai ka umnak hmun
Ka thinlung zong a mui
Lungsivang in ka um
Hi dirhmun ka phak lioah

Salai nang
Zuu ,nungak le keimah
Aho khi dah kan um
Ka ruat ngamlo tuzaan
Na thinlung

Mai Senripar
30.11.09

VALENTINE'S DAY NI AHKHIN

Salai...

Khi ni kong saduh ka that
Then caan sau hmanhseh
Khi niah cun
Ka zaanmang uktu bawi he
Lungthin chung biathli hna
A thar in kan phuan than lai
Ruah deuh ah lunghmui a zual
Nate'n na mithmai kan hmuh lo nak
A sau cang

Na hmurhmul le na sam hna
A sau cang maw?
Salai ka dawt
Kan duh tuk ka ti tawmmi bia
Ka chim tthan peng ko lai
Khi ni zongah khin

Mai Senripar

THLI TEIN

Kan duh tiah ka ttial
Van khat in.
Ka philh kho lo,
Vawlei dongh tiang ...

Salai! tiah ka au
Zaan khuadei in
Kan ngai tuk tiah
Din tein ka chim
Ka chantling.

Salai!
Fingrei a cat
Ka ruahchannak
Dar a kuai

Mai Senripar

MITTHLI DORKHAT

Afaak...
Afaak tuk ka thinlung
A liam cia caan
Ngaihnak cakuat hna
Atu ah cun an kha dih
Meittek kaa lak i ka khangdih
Ka mirh iang a lo cuahmah cang
Vutcaam aa cang dihmi ngaihnak cakuat
Ka zoh ka hacang kaa rial
Keimah le keimah
Biahalnak kaa tuah!
A vawi a tam cang
Thinlung innkhar on in
Taantakmi ka nunhlun
Ruah deuhah lungfah a zual
Ka thinlung a ttahnak a sau cang
Ka rak ruat lo
Fahnak na ka pek hnga dinghi
Lungtak lo na aanthlum hna
Duhnak a ri mi kei nih
Kaa rak zumh sual cang
Lam kan i tonah
Phanh hmasa kaa zuam
Ka thinlung cu a ttap
Liamcia caanah khan
A fekmi dawtnak ka ngei
Kan rak i tthen caan tawite hmanh
Arfi tam lak ka rak rel
Hi dirhmun ka phan te lai tiah
Mang zongah ka rak manh lo?
Ka rak ruat bak lawlaw lo
Kan duh zual lei sangah
Lam dang na pial

Salai na palh kan ti lo
Nate'n

Hrut ngaiin a palh pengmi
Kei ka thinlung hi
Kir tthan hnawh lo dingin
Mitthli he ka khar
Mangtha tuk kun ti dah lo cun
Ka caah zei biafang hmanh
A um ti lo Salai!


Mai senripar

NUN CHUNG

Mitthlam ah an cuangtthan tawn

Liamcia ka dawt na muihmel

Biacaih bawi biachahnak bang

Ruah lo pi ah nang na liam

Nawl tthan ding ah kei ka tlai cang

Ka dawt ka philh kho ti lo

Naa lawmh lio i na biangno cung

A een mi lunglawmhnak par

Ruahtthan caan ah

Mitthli a ha tawn

Na tta khupbil in

Na nunnak lam a tluan nakhnga

Ka dawt na caah

Thlacam piaknak nawl hung ka pe

Kan i tontthan ti lo tiang hmanhah

A thiangmi kan dawtnak

Dawtnak ram vawlei chungah

A hrih a nungpeng cang lai

Duhdawt in hmunkhat kan rak um tti lio

Thinlung ttangnem cung in a chuak mi

Kan i hnamhnak

Kei thinlung ah an hring rih

Dawtnak tilet cung i

Lawmin kan rak lenttinak ni le thla hna

Kei thinlung nunram ah rolung bunh bang

NUNCHUNG

Rung hmun cang lai

Feb.24, 2008 ( Sun 11:30 pm )

DAWTNAK HUATTLAI

Huat a tlai ko kan dawtnak!

Nangmah kan duhnak ruang i
Ka tinco mi nunlawmhnak
Kan dawt ruang i
Ka ticomi, mah lung sinak le mah lunghmuihnak

Na mui kan hmuh caan ah
Kan duh tuk ah ka lung a dir
Ka sining vialte an lo dih

Nangmah kan dawt ruang i
Ka tincomi lunglennak
Kan dawt ruang i
Ka tincomi ngaihchiat lungkuainak

Nangmah conak ding ca'h
A liamdih mi ka caan vial te
Zeithei lo in nangmah kong ruahnak i
Ka liamter mi suimilam hna

Na dawtnak conak ding i
Ka hrial mi thil dang vialte
Zohtthan tikah;

Kan dawtnak hi
Kei nun fahtertu lawng a rak si

Ka minung hawinih
Phai an daihlo mi
Dawtnak sung cu

Kei caahcun
Nangmah ruangah
DAWTNAK HUATTLAI
Ah a cang ai!

( Kan i dawtnak hi caan tampi ahcun nun fahter tu a rak si tawn)

Jan 3, 2008 ( Wed )

POR HLAWT TLAK LO

Kum caan an liam
Thil sining aa thleng
Kan kum a tar
Thih kan naih
Nunnak caah
Nunchung kan cawl cang
Nun sullam theih a har ko

Rum zongah
Nun a sau hlei lo
Sifah zongah
Nun a tawi hlei lo
Dawh zongah
Thihnak nih a ttih hlei lo
Muichiat zongah
Nunnak nih zaang a fah hlei lo

Mirum sifak
Muidawh muichia
Kan thi dih lai

Kan rum ruang ah
Kan i porhlaw tawn
A dih te lai
Kan sifah ruang ah
Kan nun si a vaang tawn
A hmun lai lo
Kan chuahthiam ruangah
Kan ruam a kai tawn
A tlau te lai
Chuahchia kan si ruangah
Kan tha a der tawn
A lo zau lai
Mi minthang kan si lio ah
Mi kan hmu kho tawn lo
A kan tei tu
Kan hnu ah
Artlang in an dir tung ko

Zeizong thil hi
Pakpalawng lawngte
Porhlawt pi tlak an um lo

Jan.5,2008 ( Sat )

CAAN HAR

Ka Dawt

Na umtthutnak hmun, Na tlonlennak
Na rualhawi hna le, Na hawiher hna
Mitthlam in hmuhkhawh dih ko buin!

Ka Dawt
Na thilhruk aih, Na biangki no
Na tungtai rem dawh, Na mitfang ttialttha
Thinlung mit in hmuhkhawh ko buin!

Ka Dawt
Nang he umtti in, Nan ruuninn tangah
Duhbia zaa phaiin, Caan liamter sihlaw
A nuamtuk hnga tiah
Lungthin mitthlam in cuanhkhawh ko buah!

Chunmanh mang thok in
Zaanmang tianghmanh ah
Kan tong kho ti lo
Rikhiah innchung ah
Rikhiah caan ning in
Nunhman ter lio caan!

Zingnu kutzung dawh
Sermi thil hna hmanh
Cuan kho ti lo in
Lunginn khan chungah
Bawmhren ritte bang
Caan liamter lio caan!

Dawtmi ngeihtuk ah
Lungkuai mitthli he
Zaanttim ah tho in
Catlap rang cungah
Nang zuunngaihnak bia
Ttialnak nawl te hmanh
Ngeihkhawh lo lio caan!

Unau chuaktti khat
Ngeih ve ko bu ah
Ngahttah kingro bang
Miphun dang lakah
Nunnak hman lio caan!

Zingnu thluachuahmi
Nu hrinnak holh te
Ngeih ve ko bu ah
Milung tlamtling lo bang
Kutke dong hmang in
Biazai phai lio caan!

Ttemttawn mi nun
Mi kut tang ah
Mi hruai ningin
Innzuat saram bang
Lam kal hmanh ah
Kehawrh tthialter in
Mah tlaihchanmi
Thilthuam rong hmanh
Hruk kho lo in
Thilthuam dum lawng
Hrukter lio caan!

AH!!!

Dawtmi ngaih
Chungkhar ngaih
Semnak ngaih
Mah holh ngaih
Zalonnak ngaih
Lai rawl ngaih

Kan ngeihmi dihlak fonh=
"NGAIH" asi lio caan

A har bik ko
Hi suimilam caan hi
Philh na um ti lai lo
STDC!

Zeiruang ko hen !!!!!!!!!!!!!

( Mi ramdang i thonginn chung um lio caan tuarmi nun hi a har ko)

Jan 21, 2008/ Mon 11:30 PM
DK 48

KA RAK BAAN LO

Umtti lio ah, Kan dawttuk tiah
Lungthin takin, Kan rak ti tawn
Nang lo in cun, Leicung nun hi
Ka zuam lo tiah, Lungtak ngaiin
Kan rak ti tawn

Tintling cung i, Kei lawng zau caan,
Hi vawlei hi, Dawtmi lo cun
Tlamtling maw tiah, Lungtak ngaiin
Ka rak ruat tawn

Leicung chawva, Ngeihdih hmanhning
Dawtmi lo cun, Leicung nun hi
A nuam hnga maw tiah, Lungtak ngaiin
Ka rak ruat tawn

Thihnak nunnak, Harnak phuntling
Tong ko hmanhning, Dawtmi he cun
A nuam ko lai tiah, Lungtak ngaiin
Ka rak ruat tawn

Kei ttangnem in, Ka dawt na liam ni
Kei nun ram ah, Lungkuai mei alh
Ka lungthin nih, Kei pum chungah
Meithi a vorh, Ka tuar kho lo
Nunnak mei hma; Lungdo hmahmanh
Cancuh fawi deuh hnga ka ti

Dawtnak rungrul, Thatkho tu sii
Siam hnaseh law, Nun nak zuar in
Kei kaa cawk hnga

Kei ttang cung i, Na um lio caan
Nang lo tuar ding, Ka ttih mi thil
Lethra an karh, Na liam ni cu

Thinlung chung chuak, Hmurphuan khawh mi
Kan dawtnak bia, Chimawk tlak lo
Nunram chung i, Hrihhram bunhmi
Kan dawtnak he....

Khun na dim ni lawng ah
Kan dawttuk tiah
Ka rak ruahmi
Dawtnak nakin
Kan dawtdeuhnak par an een..

Kan dawtnak hi
Ka tuarthiammi nih a rak baan lo


Dec.31,2007

HMUNSEH LAIRAM

Lai miphun hna chuahsemnak Ram
Lai miphun tlonlennak Ram
Cung Pathian thluachuahmi Ram
Daihnak cerhti putnak Ram
Aa dawhbik ko kan Lai Ram

Hmunniam nel ah si loin
Tlangsang cung tlakmi khua bang
Leibo dong tlangsang cungah
Cer ditdet in maw Lai Ram

Ram kulh chungah tlangsangsang
Ral hruang kulh bang i suang hna
Ramchung fingtlang sang hna nih
Leilung hmunhchung Lai Ram ca
Nun hmang dingin bia hreng hna

Kan luang ttilai, Ruun tiva bang
Dawtnak Rili lei panh in
Kan dirtti lai, Fingtlang sang bang
Zei thil tthial khawh lo ding in
Kan een tti lai, Chokhleipar dawh bang
Leimi nih phai len awk in
Kan kar lai hmailei panh in
Thihthih khat, Nun ah tthen lo in

Tlangsang tamnak Lai Ram
Tiva te tamnak Lai Ram
Ramsa tamnak Lai Ram
Pangpar phun tlingnak Lai Ram
Holh phun tamnak Lai RAm
Zuuvaa tamnak Lairam
Nunphung tthattha
Thilthuam tthattha
Lam phunphun
Zaihla phuntling
Ho van hai lo in
A ngei i a rum ve mi
Lai Ram chung um, Lai miphun

Lai Ram fingtlang
Lai Ram tiva
Lai Ram thlizil
Lai Ram thingram
Laimi Nunphung
Lai Miphun
Vawlei donghtiang
A hmun lai

Hmunhram seh kan Lai Ram
A vawlei hawi Ram sinah!

Feb 20, 2008

ZEI THIL POAH HI!

Chuah le Thih
Dam le Zawt
Nih le Ttah
Ceu le Mui
Lum le Kik
Chuk le Cho
Sang le Niam
Rum le Sifah
Ngan le Hmet
Thau le Der
Dawh le Chiat
Naih le Hlaat
Ngo le Nah
Ti le Mei
Miak le Sungh
Dawt le Huat
Kauh le Biit
Pum le Per
Nem le Hak
Nal le Hraat
Ttha le Chia
Bo le Rawn
Hmui le Thuut
Sau le Tawi
Ding le Ngawi
Diin le Faak
Ton le Tthen
Luh le chuah btk.. hna hi
Hraapkhat lawng hi rak um hna sehlaw
Nun hi a nuam tak hnga maw?
Zeizong thil vialte hi nunnak sullam
Ngeihtertu an rak si dih ko.

Jan.1,2008

DECEMBER PAR

Khup tthirual he, Rungtlang dongah
Zei theilo in, Thir ringawn chuah!
Zilthli sinah, Lunguam nungak he
Kutnem i tlai in, I hlirh lio caan!

Tlangsang cung in, Zanlei ninem ah
Kheek ai pah in, Lungduh dawtmi he
Hawikom dawt rual, Kan ttum lio caan!

Innttin lo in hmunkhat teah, Zaan riah kan dum
Meiphu kan kau; Kan lam kan kuui;
Similam caan, A Liam ti hmanh
Thei kho lo in, Dei ar an khuang

Sweet December zaan, Lai khuali pi
Hakha khuadai, Ngalvawr thawng le
Lawmhnak thawngpang
Li bang hnin in, A tur lio caan!

Sangveng kipin, Mei ci an zuang
Iraq ral bang, Phangphang puah thawng
Khuasik zaandai,Ttim ar khuan thawng
Uico bo-aw, Vanhla an hluan
Kei hnathlam ah

DECEMBERPAR!
Hawikom dawt dang, Zei thei loin
Ruun innchung i an tur lio ah;

Khuasik zaan dai, Zaan thlapa vangtang
Pangpar hram ah, Caan saupi chung
Phuangngam lo in, Lungchung uam mi
Duh dawtnak bia, Lungtur thather
Khuasik ti liim in, Dawtmi sin i
A voikhatnak, Van phuan lio caan!

Tthen lai kan ttih, Ttian lai kan phang
Lung aw ttawm ngai, Lung si lo le
Mit fim lo in, Fingrei kan cat
Caanttha caankhat a hung liam caan!

Inn kan hung ttin, Chun te ni tla
Zei thei loin, Thanhlor chungah
Lai hngilh bak in, Kan van i hngilh lio caan!

Nu le Pa nih, Fadawt tuarmi
Theihthiam piak in, Merem ko seh
Tiah tthangh lo tein, An kan hngilh ter
Decemberpar a um ti lo!

Kan hung phan tthan, Sianginn on caan
Mitfang tluk in, Van zohthla mi
Decemberpar, Sianginn khan chung
A luh hmasabik, Suimilam caan!

Hmuhton bal lo, Duh dawtmi he
Pa hnih hnatla in, I uar lio kha
Lungthin a tur, Thitha a ther
Nun a thak, Kheuh ah a riam ttung lo
Hngilh khawh si lo, Nun si a vang

Hmuhzungzal duh a si nain, Hmuhah lungre a thei
Tthen lai kan siang lo, Tthen tthan ah tuar a har tthan
Decemberpar!

Sianginn khar lawmh, Tthen sau cang lai
Ti van hngalh caan, Lung a leng tuk
Ton tthan ding hmanh, Ruahkhawh si lo
Decemberpar!

A rualhawi lakah, Cuangkhun in
Aa dawhbik ko;
DECEMBERPAR!


Dec.1,2007

UMM !!!!!!

Ka Dawt!

Ka mitthlam ah na cuang
Caan tlawmte ah an lo tthan tawn
Ka zaanmang ah kan manh
Chikkhat teah na tlautthan tawn

Zaanmang tal ah tongtthan ningtiah
Kupthal let in hngilhtthan kaa zuam
Kaa hngilhtthan kho ti lo fingrei cahtiang
Ka hngalhlung nih ka dawt an ruahnak
Mitkuh nih a tei kho ti lo

Zingkhua a dei, tuar a har
Ruat ti hlahning ka ti ah
Ka dawt nun ah na cuang chin
Philh ko cang ning ka ti tawn
Thazaang in ttankhawh si lo
Thinlung ah na caam chinchin

Tintling cungah chun nitla
Ka mithlam in na tlaunak ding ca
Ttangnem nam in ka thaw dawp ka rel
Na iangdawh ka lungtur nih
Thisen sin in ka nunnak ah
A vamh chin nun celhlo tiang

Zaanlei vankam sen sinah
Ka dawt kan ngaihnak zaihla
Liamhram ko cang tiah lungthli ka tum tawn
Na hung chuak tthan tawn ttim araw sinah

Zaan zuva aw nih ka dawt na iang
Theihtha in ka thluak chungah
Ttektlak thawng bang an tlirh ter tthan tawn
Ka dawt philhni na um lo

Zaan zuva le ttim ar-aw
Lungtur thawng le ka thawdawp nih
Nangmah zuunngaihnak par lawng
An enhter chin ka nun ah

Khuachim tluang tlanghra dan ah
Na tta kei lawng um khuahar in
Ni le thla ka rel lio caan
Ka dawt nang kan ngaihnak zuun
Ruh le thlek ne tiang an pil dih

Ka nun a ttam
Nang zuunngaih nak nih
Hmapawr hnaikhuar bang nun a duukter

Zuunngaih tuar in kei ka zawtnak
Damter khotu si ai ttha
Thinhnem nang he ton ding lawng
Suimilam kutke dawi in
Ka hngak ko nau hnuk hal bang

KAN NGAI TUK!..............

Jan.22,2008/Tue 11:00 PM

SIN UM DIRHMUN

Khuari tur vanttek thlak
Thlichia ruahsur thei loin
Vantawng ruuninn sang cungah
Vawlei ngeihchiah chambau loin
Lungthli ka tumkhawh pin tiang
Duhtlin nun ngei innchungkhar ah
Kei Laipa sinum ka ttuan

Zing hungchuak chungkhar kan tling
Thisenkhat nupa farual
Tthancho nak kong an hun caih
Kei cu theihter ka si ti lo

Ei le din tlamtin nak ca
Umkheng ttawl le tirawl chuan cu
Ttuanvo pek ka si nain
Khuasak tintuknak kongah
Kei cu kaa caih kho ti lo

Mirum chungkhar ah ka um
Mirum chungchuak ka si lo
Mirum tthutdan ah ka tthu
Tthutdan ngeitu ka si lo
Mirum ti le rawl ka ei
Tirawl ngeitu ka si lo
Mirum innah ka um
Inn ngeitu ka si lo

Vawlei thilri tlinnak ah ka um
Keimah ta an rak si lo
Mirum ihkhan ah ka it
Keimah ta a rak si lo
Ka nunnih a herhmi thil a tling
Keimah ta an rak si lo

Ka tonghthammi thil le ri
Ka tthutdirnak inn le lo
Ka eidin mi ti le rawl
Kaa lawmhpi mi ngeih le chiah
Keimah taa an um ttung lo

Midang ngeih le chiah cungah
Kei cu hnangam in ka um
Ka thil ah ka rak ruah mi hna
Zohkhenhtu lawng ka rak si

A nuam bik ko;
Ngaidi inn ttet chung tein
Zaan thlapa ceu le cerlian ni ceu
Bihkhawhnak innchia te le
Vanrial ruah zuhnak inn ttet chung i
Umkheng chia in rawl thaw lo te
Lai chuan tein chuan caan le
Mah chuahpimi thilri hna
Mah nawl in lai rel khawhnak
Mah bawibiknak mah inn lo
Mah duhning zalong te nunkha
A nuambik ko leicung ah

Sinum nun cu a har ko
Ka ngaidi inn ttet te kha
Ziah kei ka remhtthan deuh lo! ( Lai Ram )
Thihhlan mirum inn ah maw
Sinum ttuan inn ka liam lai! ( Ramdang Peem )

( Ramdang ah kan um nain kan umnak ram hi kan ram a si ti lai lo.)

March 21, 2008 ( Fri. 11:30 pm )

UKTU NGAN ( II )

Van ka zoh, Ka dawt a mirh
Lei ka zoh, Ka dawt a zau
Tlangsang ka cuan, Ka dawt keneh
Thlithiang ka dawp, Ka dawt rim a nam
Zaanmang ka manh, Ka dawt a bawi
Saduh ka that, Ka dawt a khat
Rili ka pilh, Ka dawt a leng
Muihnak ka phan, Ka dawt a ceu
Ka thlan a sa, Ka dawt thladem
Ka ti a hal, Ka dawt a luang
Ka khua a sik, Ka dawt a lum
A um hnga maw! Ka nun ram ah
Ka dawt a um lonak hmun
A um hnga maw! Sermi thil lakah
Ka dawt a iang khotu dang!
A um hnga maw, lei le van ah
Ka dawt bang nun uk khotu
A um hnga maw! Tthawnnak lakah
Ka dawt bantuk; Hmuh tongh khawh lo thazaang tthawng!


Dec.30, 2007

UKTU NGAN ( I )

Thinlung thah lio
Ar-ek pato caan
Pawng le kam ah
Zeithil can hmanh
Ruat kho lo in

Thinlung pengtu
Nunram lutlai
Khuaruah hruaitu

Cerlian ni ceu
Muihter kho tu
Lei le van ah
Ka dawt a khat

Dec.30,2007

LAI IANG

Lai khal nu-va khuah hrin
Lai ram chungchuak
Lai fingtlang cung tlong
Lai thlithiang dawp
Lai tithiang ding
Lai tirawl ei
Lai nunphung zul
Lai caholh hmang
Lai muihmel
Lai taksa
Lai Boban
Lai ttangaan
Lai pumrua
Lai tawttawk
Lai tungtai
Lai tanpawr
Lai kedil
Lai kutke thei
Lai tindong
Lai mitngel
Lai hmurhnar
Lai hmaithlak
Lai samthlairem
Cawmttu Lainu

An in iang lo
Kan vawlei ah
Mirh zungzal ko
Na Lai iang te he
An in tluk lo
Lei minthang nih

Iang lakah Lai nu iang aa dawh bik ko

Dec.29,2007

CAAN HARBIK

Ka dawt nang he
Tthen lai ding cu
Ka ruat ballo
Zaanmang hmanh ah

Ka tak kaa sik
A fah ka theih, ka cang a si
Ka kiang ka zoh
Ka dawt a liam

Hi bang tuarhar
Suimilam caan
Um ti hnga maw
Ka nungchung ah

Tuar ti hlahning
Ka nun dongh tiang

Ka dawt liam caan
Thinlung lungdo hma sem ni


Dec.30, 2007

NUN UK

"Kan hmuh kaa lawm
Na liam ka tuar
Na mirh ka panh
Na ngur ka ngang
Ka nun hruaitu
Na lung mithmai"

Dec.29,2007

ZEI TI TTHA

Thinlung tlah hlan
Zeiruat lo in
Lungduh thil lawng
Hringtu sinah
Kan ttahchan bang

Dawthniang nanghe
Leicung nunchung
Nun luangtti ding
Zingnu sinah
Ka ttahchan tawn

Ka manh chunmang
Minmei ro bang
An liam dih cang
Van hramdeng ah

Khuk kha fauh in
Mitthli rial he
Cuan ko ai ning
Ka dawt sungkhun
Mangttha ............

Dec.28,2007

MANSUNG BIK

Ka dawt ....
Kan dawtnak muru le a muisam
Khenglak in chimnak ding le
Fianglak in langhter nak ding ca
Leicung minung nih hmanmi holh lakah
BIAFANG a um lo

Aruang cu ...
Nang kan duhdawh hlanah
Lei le van chungum, sermi thil lakah hin
Kan dawtnak a iangkho tu
A rak um rih lo caah asi men lai!

Ka dawt ....
Na kutnem in ka piang na ka tongh
Na kutzung in ka ttang na ka muai lio caan
Vawlei hi kan mah lawng umnak hmun ah ka ruat tawn

Ka dawt ....
Hung ka kup, tthen lan ding bang
Hung ka daw, hmuh tilo ding bang

Ka nun nih himnak aherh
Nangmah sin lawng in a tling kho

Kei ka caah;
Nangmah bantuk, NU na rak sem hi
Ka nunnak cu khua a hmutthan mi mitcaw bantuk a si

Nangmah ruangah, Vawlei ah herhmi thil ka ngei ti lo
Leiah zuamcawh khawh lo ding
Nangmah bantuk NUngak tling
Kei nunnak tlin tertu ah
An sertu kan biak zingnu sinah
Lawmhbia chimning ka nunchung

Ka dawt ....
Nangmah ruangah Kaa lawmtuk
Hi vawlei ah hung ka kilveng
Kan nungchung i daw usih
Tthen lan dingbang

Jan.19,2008 (Sat)

NUNNAK

Chunzaan an liam
Siarem lo in
Nu paw chungah
Thlapa thlakua
Ttemttawn chungah
Hrambunh NUNNAK

Hun hmu Iangngei
Cerlian mithmai
Aa khat ti lo
Hlan ruahning he
Ttahhram chungah
Hrihcorh NUNNAK

Caansung sinah
Hungtthang pumsa
Lungsi hlei lo
Saduhthah bang
Buainak cungah
Hungtthang NUNNAK

Lunghmuih lo in
Hung liam chankhat
Ruahtthan tikah
Liamcia NUNNAK
Ngaihchih tungah
Kongttha bang hreng!

Dec.12,2007

KA NU LAIRAM

Muihnak chung kan um lioah
Na ruh meifar na kan vaan piak
Kan ti a hal lioah
Na thlek cerhti na kan dinh
Eiding rawl kan ngeih nakhnga
Na kengzung khangh tuar in rawl na kan khonpiak
Kan khua a sih caanah
Na kut-ke thingah na kan tihpiak
Kan thaw a pih lioah
Na rimhmui thlithiang na kan dawpter
Kan ro a rum caanah
Na innzuat saram sa na kan pek
Thlichia kan luat ngakhnga
Na zaangruh suttung ah na kan thluanpiak
Vanruah kan luat nakhnga
Na samthlairem ngaidi in na kan thuam
Kan khua a linh caanah
Na thladem hmawngtangah na kan dor ter
Kan nun a him nakhnga
Van rialruah na kan khonpiak
Kan nun a hninhno nakhnga
Tlangcung kip in na thisen tithiang na luanter
Kan nun lung a nuamh nakhnga
Na ttamhnak par phunkip na parter
Mitling kan sikhawh nakhnga
Nunphung ngeiin na kan hrin; Ro ah nunphung na kan pek
Kan innchungkhar zohkhenhtu
Hruaitu ttha zong na kan hrinpiak
Zungzal nunnak phakpi tu
Khrihfa minung na pumh hna; Khrih hngalhnak hnuk na kan dinh
LAIRAM, Vawlei ah hmebik hmanhlaw
Na fa le kan caah na nun na hmannak
Lei le van, sermi thil vialte le vawlei tuanbia nih an theih ko
Nihin ah santlai lo tiah nihsawh tong ko hmanh
Na kan dawtnak, Leilung donghtiang
A hmuncang lai ro lung phunbang

LAIRAM KA NGAITHIAM

Na tak na sa, Reudih tiangin
Na chungchuakmi, Laipa kei ca'h
Na nun na hman

Na khon hlawnchaw, Taang lo tiangin
Laipa keimah, Tthannak caah
Na ngeih na hman

NU na ttuanvo, Na tlamtlinh ko
Sifak sihmanh, Na fa le nih
Kan herh dirhmun Na kan phakter

Nihin ahcun, NU santlai lo
Lairam sifak, Tiah kaan ti cang

Mah hringtu NU, Zei rello tu
Nafa Laipa, Kei ka lungput
NU dirhmun in, Hung dirtthan law
KA NGAITHIAM KO
Lairam Ramhar, Zei hlawn ngeilo
A ruhrua lawng, Kan thidih lai
Lairam umcun, Tiah sual kan phawt

A chanchan in, Hlan pupa hna
An chan cio ah, Laipa chuahttha
Laipa lianngan, Laipa fim le
Laipa rum hna; Miphun dang van
Rak hai lo in, Hringkho tu NU
Na rak si ve ko

Nihin chanthar, Lai pa kei nih
Lairam tiang cu, Ramhar ram sifak
Ram tthangcho lo, Ram derthawm tiah
A ka hringtu, Lairam ( NU ) na dawtnak
Zei rello in, Santlai lo tiah
Kan zaamtaak cang

Na no lio i, Na rak i dawhnak
Na tit na sa, Reu dihlak in
An dawptu kei, Na fa Laipa
Nang na caah, Nunnak hmang in
Cawmtthan dingrian, Zaamtak pa kei
HUNG KA NGAITHIAM

NU zohkhenh ding, Fapa ka ttuanvo
Tlamtlinh lo in, Kan zahpinak
Kei ka lungput; HUNG KA NGAITHIAM
Lairam ka NU

PHUANG PHAWT USIH

Ni a chuak a tlatthan
Zaan a chuak a deitthan
Ruah a sur a hantthan
Khua lum a kik tthan
Thlichia a hrang a daitthan
Kan i lawm, kan ttaptthan
Kan tlamtling, a chambautthan
Kan idaw, kan i tthentthan
Kan chuak, kan thitthan
Vawlei nun hi zeidah a si?
"Duhtlin lonak, kan khuallam
Parpar bantuk, minmeizam bantuk tbk..
Biatuah um len hmanhseh
Vawlei nun hi kan tlaihchan ko.
Kan nun chung i kan tonmi thil
Kan tuar mi nun; vialte hi
Minung tuanbia ah rolung bunhbang
An rung tang lai, lei ciamser tiang
Kan lungchung bia
Ro catlap ah, khumh cio u sih
Nunnak tuanbia chim tu ah...........